Monday, September 22, 2008

ಮಂಡಕ್ಕಿ ಕಡಲೇಕಾಯಿಯ ಆಟ

ಮನೆಯಲ್ಲಿ ಖಾರದ ಮಂಡಕ್ಕಿ ಮಾಡಿದರೆ ಎಲ್ಲರಿಗೂ ಖಾರದ ಮಂಡಕ್ಕಿಗಿಂತ ಹುರಿದ ಕಡಲೇಕಾಯಿ ತಿನ್ನೋದಕ್ಕೇ ಹೆಚ್ಚು ಖುಷಿ ! ಡಬ್ಬವನ್ನು ಮೇಲೆ ಕೆಳಗೆ ಅಲ್ಲಾಡಿಸಿ, ಮೇಲ್ಬರುವ ಕಡಲೇಕಾಯನ್ನು ಆರಿಸಿ ಆರಿಸಿ ತಿನ್ನುವುದೇ ಮಜ ! ಆದರೆ ಈ ಮಂಡಕ್ಕಿ ಮತ್ತು ಇನ್ನಿತರ ವಸ್ತುಗಳ ವಿಚಿತ್ರ ಸ್ವಭಾವಗಳ ಬಗ್ಗೆ ಸಂಶೋಧನೆ ನಡೆದಿರಲಿಲ್ಲ ಇತ್ತೀಚಿನವರೆಗೂ !!!

ಬರೀ ಮಂಡಕ್ಕಿಯೇ ಅಲ್ಲ, ಸಕ್ಕರೆ, ಮರಳಿನ ಮೇಲೂ ಯಾರೂ ಸಂಶೋಧನೆ ಮಾಡಿರಲಿಲ್ಲ. ಇವೆಲ್ಲ ಘನ ವಸ್ತುಗಳು (ಸಾಲಿಡ್ ) ಎಂದು ಎಲ್ಲರಿಗೂ ಗೊತ್ತು. ಆದರೆ ಸಕ್ಕರೆಯನ್ನು ಡಬ್ಬದಲ್ಲಿ ಹಾಕಿಟ್ಟರೆ ಅದು ಘನವಾಗಿದ್ದಾರೂ ಅದು ಬಾಟಲಿಯ ಆಕಾರವನ್ನೇ ಪಡೆಯುವುದನ್ನು ನೋಡಿರುತ್ತೀರಿ. ಇಷ್ಟು ದಿನ ಬರೀ ದ್ರವಗಳು ಮಾತ್ರ ಪಾತ್ರೆಯ ಆಕಾರವನ್ನು ಪಡೆಯುತ್ತವೆಂದು ತಿಳಿದಿತ್ತು. ಘನವಾಗಿದ್ದರೂ ಪಾತ್ರೆಯ ಆಕಾರ ಪಡೆಯುವುದು ಈ ತರಹದ ಸಣ್ಣ ಸಣ್ಣ ಹರಳು(crystal)ಗಳ ಅತಿ ವಿಚಿತ್ರ ಲಕ್ಷಣ. ಇದಕ್ಕೆ ಕಾರಣ ಇವುಗಳಲ್ಲಿ ಇರುವ ಕ್ಲೋಸ್ ಪ್ಯಾಕಿಂಗ್ ಅರೇಂಜ್ಮೆಂಟ್. ಅಂದರೆ, ಇರುವ ಜಾಗದಲ್ಲಿ ಎಷ್ಟು ಸಣ್ಣ ಸಣ್ಣ ಹರಳುಗಳನ್ನು ಕೂಡಿಸಬಹುದು ಎಂಬ ಒಂದು ಲೆಕ್ಕಾಚಾರ. ಮರಳು ಮತ್ತು ಸಕ್ಕರೆ ಮಾತ್ರವಲ್ಲದೇ, ಖಾರ ಹಾಕಿದ ಮಂಡಕ್ಕಿಯಂಥಾ ವಿವಿಧ ಸಾಂದ್ರತೆ(density)ಉಳ್ಳ ವಸ್ತುಗಳ ಮಿಶ್ರಣದಲ್ಲೂ ಈ ಕ್ಲೋಸ್ಡ್ ಪ್ಯಾಕಿಂಗ್ ಅರೇಂಜ್ಮೇಂಟ್ ನೋಡಬಹುದು.

ಮಂಡಕ್ಕಿಯ ಸಾಂದ್ರತೆ ಕಡಲೆಬೀಜದ ಸಾಂದ್ರತೆಗೆ ಹೋಲಿಸಿದರೆ ಕಡಿಮೆ. ದೊಡ್ಡ ಕೊಬ್ಬರಿಯ ಚೂರು ಕಡಲೆಬೀಜದ ಸಾಂದ್ರತೆಗಿಂತ ಕಡಿಮೆ. ಇವುಗಳೆಲ್ಲವೂ ಖಾರ ಹಾಕಿದ ಮಂಡಕ್ಕಿಯಲ್ಲಿ ಮಿಶ್ರಣದ ರೂಪದಲ್ಲಿ ಇರುತ್ತವೆ. ಹೇಗೆ ಹೇಗೋ ಇರುತ್ತವೆ ಹೊರತು ವ್ಯವಸ್ಥಿತವಾಗಿರುವುದಿಲ್ಲ,ಚಿತ್ರ ೧ ರಲ್ಲಿ ನೋಡಬಹುದು.


ಒಮ್ಮೆ ಡಬ್ಬವನ್ನು ಕುಲುಕಿದಾಗ ಇವುಗಳೆಲ್ಲದರ ಸ್ಥಾನ ಪಲ್ಲಟವಾಗುತ್ತದೆ. ಕಡಲೆ ಬೀಜದ ಕಾಳು ಮೇಲೆ ಹೋದಾಗ ಈ ಸಣ್ಣ ಸಣ್ಣ ಮಂಡಕ್ಕಿಯ ಕಾಳುಗಳು ಕಡಲೆ ಬೀಜದ ಸ್ಥಾನವನ್ನ ಬಹು ಬೇಗನೇ ಆವರಿಸಿ, ಆ ಖಾಲಿ ಜಾಗವನ್ನು ಭರ್ತಿ ಮಾಡಿಬಿಡುತ್ತವೆ. ಕಡಲೇ ಬೀಜ ಮತ್ತೆ ಕೆಳಗೆ ಬರುವ ಹೊತ್ತಿಗೇ ಇದು ಆಗಿ ಹೋಗಿರುತ್ತದೆಯಾದ್ದರಿಂದ ಪಾಪ ಕಡಲೇ ಬೀಜಕ್ಕೆ ಮೇಲೆ ಹೋಗದೇ ಬೇರೆ ದಾರಿಯೇ ಇಲ್ಲ ! ಈ ವಿದ್ಯಮಾನವನ್ನು " percolation effect " ಎಂದು ಕರೆಯುತ್ತಾರೆ. ಚಿತ್ರ ೨ ರಲ್ಲಿ ನಿಮಗೆ ಡಬ್ಬ ಕುಲುಕಿದ ನಂತರದ ಸ್ಥಿತಿ ಕಾಣಿಸುತ್ತದೆ.


ಇಲ್ಲಿ ಕಡಲೆಬೀಜಗಳ ಸ್ಥಾನ ಪಲ್ಲಟವಾಗಿ ಮೊದಲಿಗಿಂತ ಹೆಚ್ಚು ಕಡಲೆ ಬೀಜಗಳು ಮೇಲೆ ಬಂದಿರುವುದನ್ನು ನೋಡಬಹುದು.

ಇದರ ಬಗ್ಗೆ ಸಂಶೋಧನೆ ಮಾಡಿ, ಬರೀ ಸ್ಥಾನಪಲ್ಲಟದಿಂದ ಮಾತ್ರ ಅಲ್ಲ, ಸಂವಹನ (convection) ದ್ದೂ ಪಾತ್ರ ಇದೆ ಅಂತ 1993ರಲ್ಲಿ ಪತ್ತೆ ಹಚ್ಚಿದ್ದಾರೆ ! ಬರೇ ಹದಿನೈದು ವರ್ಷದ ಕೆಳಗೆ ! ಅಲ್ಲಿಯ ತನಕ ಇದರ ಬಗ್ಗೆ ಯಾರೂ ಹೆಚ್ಚು ಗಮನ ಕೊಟ್ಟಿರಲಿಲ್ಲ.
ಕುತೂಹಲಕಾರಿ ಮತ್ತು ವಿಸ್ಮಯಕಾರಿ ವಿಷಯ ಅಲ್ಲವೇ ?

6 comments:

ಅಂತರ್ವಾಣಿ said...

:)

sunaath said...

ಕಡಲೇಕಾಯಿ ಮೇಲೇ ಇಷ್ಟು ಸಂಶೋಧನೆಯೆ! ಟೈಮ್-ಪಾಸ್ ಕಡಲೇಕಾಯಿ!

shivu K said...

ಕಡಲೇ ಕಾಯಿ ಹಿಂದೆ ಬೀಳುವ ಬದಲು ಗೋಡಂಬಿಯನ್ನು ಸಂಶೋದಿಸಬಾರದ. ಪ್ರಯತ್ನಪಡಿ ಒಳ್ಳೇದಾಗಲಿ!

ನಾನು ಈ ಬ್ಲಾಗ್ ಲೋಕಕ್ಕೆ ಹೊಸ ಸದಸ್ಯ. ನೀವೊಮ್ಮೆ ನನ್ನ ಬ್ಲಾಗಿನೊಳಗೆ ಬನ್ನಿ. ಅಲ್ಲಿ ನನ್ನ ಛಾಯಾಚಿತ್ರಗಳು ಹಾಗೂ ಅದರ ಬಗೆಗಿನ ಲೇಖನಗಳು ನಿಮಗೂ ಇಷ್ಟವಾಗಬಹುದು. ನನ್ನ ಬ್ಲಾಗ್ ವಿಳಾಸ:
http://chaayakannadi.blogspot.com

ಮತ್ತೊಂದು ಅಶ್ಚರ್ಯಕ್ಕೆ
http://camerahindhe.blogspot.com/
ಶಿವು.ಕೆ

Harish - ಹರೀಶ said...

ನೀವು ಓದಿದ್ದಕ್ಕೂ, ಕಡಲೇ ಕಾಯಿ ಮೇಲೆ ಮಾಡ್ತಿರೋ ಸಂಶೋಧನೆಗೂ ಎತ್ತಣಿಂದೆತ್ತಣ ಸಂಬಂಧವಯ್ಯಾ?

chetana said...

lakshmi, intha blog namage bEku. vijnanavanna ishTu simple Agi effective Agi kannaDadalli hELabahudu anta tiLidu khushiyAytu. dayaviTTu regularrAgi update mADi. kAdiruttEne.

ಪಾಲಚಂದ್ರ said...

ಸಕ್ಕತ್ತಾಗಿದೆ